رأيي بلعبة Super Mario 3D World
يو~ رجعت مجدداً.
وهنا بتكلم عن لعبة جربتها من فترة وهي سوبر ماريو 3D ورلد، لكن طبعا نسخة السويتش، وهي اصلا كانت نازلة قبل في ال"Wii U" لكن انا ما جربتها عليه لانه ما كان عندي، فكانت فرصة حلوة اجربها.
اللعبة سعرها 60$، وللعلم انه نسخة السويتش في معها اضافة زيادة وهي "Bowser's Fury" وهي منفصلة تقدر تلعبها حتى لو ما خلصت 3D ورلد ، وطريقة لعبها زي ماريو اوديسي وغيرها من نفس الطريقة.
لكن ما بتكلم عن الاضافة، وبتكلم عن 3D ورلد فقط هنا.
--
اللعبة في البداية تخليك تختار شخصية من اربعة شخصيات، ودا شي خلو يضيف تنويع كبير، لان كمان كل شخصية مختلفة في لعبها عن التانيه، والشخصيات هي:
ماريو، وهو المتوازن فيهم من ناحية سرعة وارتفاع نطته. ولويجي، أبطأ من ماريو لكن نطته عالية. الاميرة بيتش، وهي تقدر تطفو لفترة اذا نطت. وكمان تود، ما ينط عالي لكنه سريع مره.
ودا حلو، تنوع في الشخصيات وطريقة اللعب، وكمان تقدر تلعب اللعبة كاملة بأي شخصية، وتلعبها كمان كاملة مع ناس غيرك ويوصل عددكم لأربعة سواء اونلاين او على نفس الجهاز وكل واحد يختار شخصيته. تقدر طبعاً تلعبها لحالك لكن بتكون امتع اذا مع احد. انا للاسف لعبتها لحالي ؛^؛💔
للعلم انه اذا لعبت في العالم الإضافي الأول بتقدر تطلع شخصية سرية جديدة تلعب بيها. لكن لازم تخلص مرحلة معينة علشان تطلعها.
--
اللعبة فيها عوالم كتيرة، في 8 عوالم في اللعبة وفي كمان 3 عوالم سرية.
كل عالم يختلف عن التاني كشكل وكأجواء وكل عالم له مراحله وكل مرحلة يكون لها جو وشكل خاص، يمكن تتشابه في بعض العوالم ولكن المحتوى وتصميمها يختلف من مرحلة للتانية.
وكل مرحلة لها موسيقى والموسيقى بشكل عام جيدة، بعضها حلو وبعضها عادي لكنها ككل جيدة جداً.
المراحل متنوعة وممتعة وبعضها فيها تحدي حلو، ويكون احياناً فيها اماكن سرية علشان تلاقي فيها النجوم الي تجمعها او الستيكرز، او تكون اماكن سرية فيها تحدي معين عدلازم تخلصه علشان تاخد النجمة. وحاول تجمع اكبر عدد ممكن من النجوم لان في بعض المراحل ما تفتح معك الا لما يكون عندك عدد نجوم معين، فلازم تجمع كتير. وتجميعهم مو صعب فبعضهم يكونوا واضحين قدامك.
غير المراحل العادية في بعض المراحل الإضافية تكون موجودة، زي مراحل كابتن تود، ومراحله تخليك تلعب بيه ويكون نظامها مختلف فأنت ما تقدر تنط فقط تمشي وتجمع النجوم كلها علشان تخلص المرحلة، وفي كم مرحلة له في عوالم مختلفة. في كمان مراحل البيت الزجاجي -انا كدا اسميه- ويكون فيه عشرة مراحل ويكون فيها تحدي واحد يتكرر فكل المراحل لكن بصعوبة وطريقة مختلفة في كل مرحلة.
وفي مراحل سرية تكون في أنابيب سرية تلاقيها لما في العالم لما تمشي فيه، ويكون فيها ميني بوس احياناً.
وفي بيت تود، الي يكون فيه صناديق تعطيك اغراض تستخدمها في المراحل، زي الوردة النارية او الجرس وغيره، لكن البيت يختفي بعد ما تاخد الي فيه.
وفي الاماكن حقت الجوائز -اسماء غريبة اسف- وهي اماكن تلعب فيها حقت التطابق، جيب اربعه اشكال متشابهة وتاخد كوينز عليها وكل شكل له كوينز غير ولما تجمع عدد مناسب يعطيك محاولات زيادة. كمان مراحل زيادة وهي مراحل تجميع الكوينز، وهي مرحلة ما فيها شي غير انك تجمع اكبر عدد كوينز ممكن، وهي مراحل زيادة تكون كمكافأة لك، والكوينز الكتير يعطيك محاولات زيادة طبعاً -المحاولات هنا اقصد الارواح او الحيوات الي عندك-
في مراحل الميني بوس، غير الميني بوسز السريين، بعضهم يكونوا موجودين في خريطة العالم الي انت فيه، ولازم تهزمهم علشان تكمل.
ونهالة كل عالم في بوس كبير لازم تهزمه علشان تروح للعالم الي بعده، وفيهم تنوع حلو وتحدي جيد.
كل العوالم بدا النظام، ودا يبين ان اللعبة مليانة بالأشياء ومليانة محتوى تقعد تلعبه لوقت طويل.
--
اللعبة مليانة حاجات حلوة، لكن طبعاً فيها سلبيات ازعجتني وضايقتني مرة، منها التحكم.
التحكم مو سيء بشكل عام لكن مرات ما يكون ثابت او دقيق، واكتر من مرة كنت أخسر بسبب اني كنت ابغا انط لمكان معين لكن التحكم يوديني لمكان تاني برا المرحلة واخسر.
وفي مراحل موجودة اكرهها مرة وهي المراحل المتحركة، الي تتحرك فيها الكاميرا بشكل تلقائي، زي مراحل القطارات، المراحل دي مزعجة مرة خصوصاً اذا كنت قاعد تحاول تجمع الحاجات السرية فيها من نجوم وغيرها، ومع مشاكل التحكم الي تطلع فجأة ودي المراحل مع بعض تكون اكتر مراحل اخسر فيها.
وعلى موضوع الكاميرا، الكاميرا هنا سخيفة مرة، ما تقدر تحركها بكيفك، تقدر بس تحركها لزواية معينة فقط غيرها ما تقدر، وكمان في مراحل تكون الكاميرا ثابتة فيها في مناطق تحتاج تشوف فيها كويس لكن لا، ثابته ما تقدر تحركها ودا يقيدك وقت اللعب او لما تحاول تجمع النجوم لان بعضها يكون واضح مكانه لكن ما تقدر تشوفه بسبب الكاميرا.
كمان من الي مو عاجبني هي الصعوبة، عشوائية مرة. تلعب مرحلة سهلة وعادي بعدها مرحلة اصعب منها بكتير، وبعدها مرحلة عادية، وبعدها صعبة، وسهلة بعدين. الصعوبة مو تدريجية من مرحلة للتانية. ودا كان شي غبي ويقهر.
--
الخلاصة:
الايجابيات:
تعدد الشخصيات.
اللعب الجماعي سواء على نفس الجهاز او اونلاين.
الموسيقى الجيدة.
تعدد العوالم و تنوع المراحل.
الرؤساء المتنوعين.
تصميم المراحل الجميل.
السلبيات:
تخلف التحكم في بعض الأوقات.
محدودية الكاميرا في التحكم.
الصعوبة العشوائية بين المراحل.
--
بشكل عام، وبعد ما لعبت اللعبة لمدة 16 ساعة تقريباً، ممكن تاخد مني (7.5/10). اللعبة ممتازة جداً وحلوة وبتكون احلى لو تلعبها مع ناس، فيها بعض المشاكل لكنها مو مشاكل قاتلة، بس خربت علي تجربتي شويه.
لكنها لعبة تستحق مع مدتها ومحتواها الكبير، وغير الاضافة الي فيها الي فيها تنوع مختلف، لكني ما جربتها فما بتكلم عنها.
--
وكدا خلصت، اسف لو كان كلامي كتير هنا.
شكراً~ واتمنى النشر والدعم.
تعليقات
إرسال تعليق