أشياء أتمنى تصير بألعاب بوكيمون القادمة

 

آهلاً آهلاً~

الموضوع دا احسه مهم، ومن أول ابغا اتكلم عنه، فأعتذر عن الكلام الكتير دا، أنصحكم وانتوا تقروا دا الكلام انكم تاكوا شي او تشربوا لانه موضوع تقيل شويه.

استمتعوا~

--

واحد: الصعوبة.

من الأشياء الي تضايقني وانا العب هي سهولة اللعبة، غباء الأعداء والي يخلي اللعب مرات بدون تفكير. اللعبة دائماً سهلة وما فيها تحدي كبير، لكن بنفس الوقت ما ينفع تكون اللعبة صعبة بدون الأخذ بعين الاعتبار اللاعبين الصغار او الجدد في اللعبة. وأنا عندي فكرة عن كيف ممكن تتوزع مستويات الصعوبة.

ممكن تكون بهدا الشكل، الفكرة الأولى انه يكون في أربع مستويات صعوبة موجودة. شي موجود فأغلب الألعاب، تختار مستوى الصعوبة المناسب لك. وممكن اقسمهم كالأتي:

--الأولى Beginner--

تكون اللعبة في الغالب موجهة للجدد وتكون فيها الصعوبة اسهل شويه من المعتاد مع أعداء بمستوى ذكاء قليل.

--التانية Trainer--

تكون اللعبة بنفس مستوى الصعوبة المعتاد الموجود في ألعاب بوكيمون بشكل عام. لكن مستوى ذكاء الأعداء اعلى شوية

--التالتة Leader--

هنا تغيير اكبر، هنا تكون بصعوبة اعلى ويكون Level الأعداء نفس Level بوكيموناتك او اقل بشويه ومستوى ذكاء اعلى للاعداء.

--الرابعة Champion--

الصعوبة هنا تكون اعلى، Level الأعداء مساوي لك او اكتر منك لكن بشويه، ويستخدموا بعض الاستراتيجيات ومستوى ذكائهم أعلى من قبل لكن اكيد مو مستحيل.

اخدت فكرتها من لعبة "Pokémon Smile" مع تعديل اشياء صغيرة.

كدا بيصير لكل شخص مستوى الصعوبة المناسب له ويختاره من بداية اللعبة.

..

في فكرة تانية لمستوى الصعوبة وهنا يتغير حسب الشخصية.

في العادة وفي العاب بوكيمون، تكون الشخصية الي تختارها في اللتبة صغيرة في السن، عشرة سنوات تقريباً فجا في بالي، ليش ما الصعوبة تتغير حسب الشخصية الي تختارها.

يكون في أربع شخصيات تختارها، شخصيتين ولد وبنت يكونوا صغار، وتكون صعوبتهم زي صعوبة Trainer، وشخصيتين يكونوا كبار، نقول أعمارهم 15-17 سنة يمكن، وتكون صعوبتهم زي صعوبة Leader.

وكدا كل واحد يختار الصعوبة حسب شخصيته، او ممكن ندمج الفكرتين مع بعض، كل شخص يختار الصعوبة الي يبغاها مع الشخصية الي يبغاها، وكدا يكون في حرية اكبر للناس الي تلعب.

--

اثنان: القصة والشخصيات.

بوكيمون لعبة RPG، لكن القصص فيها بسيطة وسطحية اغلب الوقت والقصة تعتبر نقطة ضعف في اللعبة مقارنة بألعاب من نفس النوع، فأنا اتمنى تحسين في القصة، ما اقول تكون عميقة وتقيلة مرة لكن، تكون افضل، فيها كتابة أفضل وما يمنع من وجود مواقف درامية فيها.

واتمنى يكون في تحسين في الشخصيات لان، احيانا ما يكون في شخصيات جيدة وفي الألعاب الاخيرة.. في شخصيات مزعجة.

في نقطة مهمة كمان بضيفها لنقطة القصة وهي، شيء مهم مع القصة وهو، التمثيل الصوتي.

اثنان ونصف: التمثيل الصوتي.

كلعبة RPG دا النوع من الألعاب فيه قصص تكون طويلة وفيها كلام وحوارات كتير، والتمثيل الصوتي مهم فنوع زي دا، لازم يكون في تمثيل صوتي لانه صراحة انا، والبعض من الي اعرفهم مرات تنخطى حوارات مو لانها مو مهمة، لكن.. كتيرة، والقراءة لوقت طويل متعبة الصراحة فإضافة تمثيل صوتي بيكون حلو، واتمنى يكون تمثيل صوتي كويس وما يكون شي تسليكي، واتمنى يتجنبوا نفس المشكلة الي ازعجتني في زينوبلايد2 "مشهد فيه تمثيل صوتي بعدين الشخصيات تكلم بعض بدون صوت بس حوارات" مدام في كلام قاعد يصير، حطوا صوت!

--

ثلاثة: العالم والتحرك فيه.

لعبة بوكيمون تحتاج عالم حي، متحرك بشكل مستمر ما يكون كبير بشكل ما منه فايدة لكن يكون شي ممتع للاستكشاف والتنقل فيه، وعلى سيرة التنقل. ابغا يكون في تنوع في المشي، تقصد. في جزء"X/Y" كنت لما تستخدم الدي باد الشخصية تمسي بشكل عادي أو تجري -لما تضغط على B- ولما تستخدم الانالوق/جويستك كانت الشخصية تتحرك بأحذية تزلج، نفسي دا الشي يرجع كان ممتع.

في كمان ان ما كنت غلطان، في الجيل التالت كان في أنواع من الدراجات، وحدة سريعة مره والتانية تخليك تقفز، كدا بيكون في تنوع في الحركة إما مشي، او تزلج، أو بالدراجة واذا عالم مفتوح، بيكون كدا التنقل ممتع.

بالنسبة للعالم، فزي ما قلت ما ابغاه كبير وفاضي، اذا لازم كبير خلوه ممتع، تكون فيه نشاطات متنوعة او ميني جيمز او شي يخلي اللعب حلو وبعيد عن التكرار، التكرار بيخلي اللعبة مملة.

--

اربعة: التعريب.

أجل، احس لعبة بوكيمون تحتاج تعريب، ودا للعلم بيفيد ناس كتير وبيكون سبب لأن اللعبة تنتشر اكتر خصوصاً هنا فعالمنا العربي، ففي كتير ناس يشتروا العاب معينة فقط لان فيها تعريب سواء دبلجة او ترجمة القوائم والحوارات.

بالنسبة لي الدبلجة مو مهمة مرة، يكون في تمثيل صوتي مع ترجمة عربية بيكون احسن. الدبلجة العربية يمكن تجي بعدين لكن، لا يكون اول شي يسووه.

وكمان من الأشياء المهمة الي ابغاهم يتجنبوها وقت التعريب اذا بيسووه، هو التحريف والتغيير، فأنا ما ابغا العب او اشوف شي احسه ناقص. خلو ترجمتكم جيدة.

--

خمسة: البوكيمونات.

نفسي، واتمنى، انهم يتركوا حلب البوكيمونات القديمة ويتركوا كل شي يخص الألعاب الاولى وإقليم كانتو وغيره، لاني كرهت وطفشت وانا اشوفهم ينحلبوا فكل جزء وكل لعبة.

نفسي يسوو نفس الي صار في جزء "Black/White" انه كله بوكيمونات جديدة وما قد ظهرت في أي لعبة قبل. فكرة اني اشوف بوكيمونات قديمة تخلي الرغبة في صيدهم تقل، وتصير مجرد تجميع عادي بهدف اكمال البوكيديكس فقط، لكن لو كان كل البوكيمونات جديدة بيكون في حماس اكبر لتجميع بوكيمونات جديدة تظهر لأول مرة.

--

في نقاط تانية ابغا اتكلم عنها لكن، معرف ما عرفت اوزعها زي الي فوق فبتكون مع بعض هنا ومنها.

مثلاً من الأشياء الي كانت عبيطة في الجزء الي فات "Sword/Shield" هي الملابس، ليش اقدر اشتري ملابس اذا لما اركب الدراجة تتغير او لما ادخل اي نادي تتغير؟ مشتريهم علشان اشوفهم على شخصيتي وفجأة ادخل نادي وتتغير، ابغا دا يتغير وانه لبسي الي البسه واشتريه يبقى علي فين ما رحت.

في شي كمان كان عبيط في الجزء الي فات وهو شكل الأندية والمباريات فيها والخ، كان شكلها من برا بايخ، وشكلها من جوا بايخ، وزي ما قلت قبل الملابس حقت النادي بايخه، كدا كانت شي بايخ وعبيط، فكرتها انها تشبه كرة القدم مو حلوة صراحة، ونفسي لو تكون زي قبل في الألعاب القديمة، انه كل نادي له جوه الخاص وتصميمه من برا ومن جوا يكون مختلف من نادي لغيره، بيكون احلى بكتير.

وعلى سالفة الاندية، نفسي يكون في تغيير شويه في ترتيب الاندية ونفسي يكون اول نادي تباري فيه في اللعبة يكون نادي من نوع التنين، مدري بس ابغا كدا، احسه بيكون تغيير حلو وتحدي كمان لانه نوع التنين قوي وصعب تهزمه إذا كان بالبداية. يعني، مجرد تغيير~

ابغا تحسين في الموسيقى، لأن الموسيقى في بوكيمون بشكل عام، عادية -وعبيطه في بعض الاحيان- واحس تحتاج تكون احسن.

نفسي ياخدوا وقتهم في التكوير، وما يستعجلوا، وتنزل اللعبة كاملة وفيها كل شي بدون جزء مكمل او اضافات تكميلية، ابغا لعبة وحدة فيها كل شي. ودا يمكن اهم شي.

--

و.. وبس؟ اعتقد دا كل الي عندي ومافي شي تاني ممكن اقوله، ممكن.

احس الكلام كان مرة كتير فأعتذر عنه لكن، لانه موضوع مهم ويحتاج كلام.

بالنسبة لكم ايش الاشياء الي تبغوها تتغير في اللعبة؟ وهي في اشياء تتفقوا معي عليها؟ الردود مفتوحة للكل.

شكراً على وقتكم، واتمنى تدعموني للاستمرار~