رأيي بأنمي The God Of High School

يوو يوو~ مرحباً جميعاً~

ادري سحبت مره كتير لكن، صراحة ما كان عندي شي انزل عنه، بس دي المرة بنزل عن أنمي كنوع من التغيير وبما ان الأنمي دا خلص قلت بعطي رأيي وانطباعي عنه.

--

أنمي "The God Of High School" نزلت أخر حلقة له يوم 28 سبتمبر من سنة 2020 وهو من أنميات دي السنة وعدد حلقاته 13 حلقة وهو في الأساس مقتبس من مانهوا كورية.

--

أول مرة سمعت فيها عن دا الأنمي هي لما قالوا انه من أعمال كرانشي رول الأصلية، هنا كنت احسب انه من تأليفهم ورسمهم وتحريكهم وكدا، وطبعاً هو مو كدا لكن، اظن قصدهم بعمل أصلي هو.. انهم هم المتكفلين بإنتاجه؟؟ اعتقد، او يمكن يقصدوا شي تاني ما اعرف ولكن، دا مو مهم، المهم الان الأنمي نفسه، كيف كان؟

--

صراحة، الانمي كويس، فيه احداث كويسة وشخصيات جيدة لكنه الصراحة من ناحية القتالات، يا ساتر! جرعة عالية من الإبداع والفخامة في القتالات مع موسيقى فخمة وتحريك واخراج مميز ورائع جداً، الصراحة حلقاته ما ينمل منها ومشاهدته ممتعة. لكن..

الصراحة لاحظت شويه اشياء ما عجبتني فيه، وواضحة للكل زي سرعة الأحداث، ما أعرف ليش مستعجلين مره، كدا دوبه يخلص شي وفجأة ندخل فشي تاني بدون فترة راحة ويمكن دا يعجب البعض انه كله حماس فحماس بدون انقطاع لكن، شفته مزعج لانه ما يعطي فرصة لشرح الأحداث.

كان في شي تاني مزعج، وعلى الرغم من انه الاحداث سريعة لكن في بعض الأوقات يكون في حشو ما منه فايدة، خصوصاً التعمق بماضي الشخصيات الي ما عاد ظهرت تاني، والمشكلة ان دي الشخصيات الي يتعمقوا بماضيها تكون شخصيات تطلع مرة وحدة وتنهزم بسهولة وبعدين تختفي ولا عاد ترجع، ليش تتكلم عنها طيب؟ مدام شغلك سريع كدا عدي عليهم بسرعة كمان، "لكن" دا الكلام عن الشخصيات الجانبية فقط، الشخصيات الرئيسية يكون لها اهتمام اكبر من الباقي وتركيز اكتر.

الانمي كان ماشي كويس لكن فجأة صار فوضى وحوسه ومدري ايش كدا قربعه الوضع صار ودا كان بايخ الحق، كان ماشي كويس لكنه صار كأنه مستعجل يبغا يخلص منه بسرعة ودا خرب وأثر على الأنمي، وكان الأنمي في البداية كان باين انه عادي من ناحية القتالات، لكن لما دخلت سالفة القوة الخارقة في الموضوع او زي ما يسموها في الأنمي "التشاريوك" هنا صار الوضع كيس، كيس مره كدا عاصفة كيسية غطت وجهي واصر في اشياء مبالغ فيها مرة، لكن فنفس الوقت ومع انها اشياء كيس لكن كانت مع الأجواء والقتالات تعطي حماس حلو، وأتوقع بسبب الاخراج لانه ممتاز الصراحة فيظهر لك المشهد العادي بشكل مختلف ومميز.

في شي سمعته في فترة عرض الأنمي وهي انه الانمي نفسه مختصر أشياء من المانهوا وساحب على أيشاء ومو مقتبس منها بشكل كامل، ودا كمان واضح في العمل حتى للناس الي مو قاريه للمانهوا، ودا مو حلو، ما اعرف الاختصارات دي جات لكل شي ولا لحاجات معينة الصراحة.

لاحظت فيه كمان ان القصة والدراما فيه بايخه وما فيها عمق، او دا الي انا لاحظته وحسيت فيه لانه ما أثر فيا صراحة، حاول يجيب لحظات محزنه لكنها، كانت ضعيفة وبدون تأثير وحتى كتابة بعض الشخصيات ما كانت داك الشي.

--

الإيجابيات:

رسم مميز وجميل.

تحريك رائع.

إخراج مبهر.

شخصيات جيدة.

موسيقى مميزة.

قتالات ممتازة.

السلبيات:

ضعف القصة.

الأحداث الفوضوية.

الدراما ضعيفة.

سرعة الأحداث.

الحشو ببعض الأحداث.

--

بكل صراحة، هذا الأنمي جميل وممتع ويملك موسيقى رائعة وهو ممتاز بالقتالات الحماسية وجودة إخراجه لكنه ضعيف بأحداثه وقصته ويعيب عليه العشوائية وسرعة الأحداث.

--

أنمي أنصح به صراحة وبعطيه تقييم (7/10) ممتاز وحلو لكن فيه بعض المشاكل الي يمكن ما تلاحظها بسهولة، لكنها موجودة.

--

دي أول مرة اسوي زي مراجعة لأنمي، ما أظن بتكون أول مره لكن ممكن اكمل فيها و، اسف لو ثرثرت كتير ؛^؛ حاولت اختصر.أتمنى منكم الدعم وشكراً لك~☆