رأيي بلعبة Pokémon Sword/Shield
مرحياً جميعاً~
وأخيراً وبعد تأخير لفترة طويلة جداً قررت انزل رأيي/ مراجعتي للعبة بوكيمون سورد/شيلد وأنا أخدت نسخة شيلد. سبب التأخير صراحة كان إنه اللعبة ما وصلت عندنا بدري لين جات لكن وقت فترة إختبارات فانشغلت عنها.
-----
لعبة بوكيمون سورد/شيلد نزلت في 15 نوفمبر في 2019 على السويتش والسويتش لايت وسعرها 60$ دولار وتقدر تلعبها على الطاولة أو على التلفزيون أو بوضع المحمول بالنسبة للسويتش، وبوضع المحمول فقط بالنسبة للسويتش لايت. وهي تعتبر الجيل الثامن من ألعاب بوكيمون.
تقريباً بدات فيها يوم 3 أو 4 يناير، وما خلصتها إلا يوم 21 يناير ؛^؛ ليش طولت؟ لاني كنت العبها على راحتي وماخد وقتي فيها ومو مستعجل وخلصتها تقريباً في 29:36 ساعة تقريباً بالقصة مع القصة الإضافية.
-----
أنت تبدا بداية شويه مختلفة عن الألعاب بوكيمون الي قبل، فأت تبدأ بإنك تسجل في بطولة رسمية علشان تصير البطل، تفوز على الأندية الثمانية علشان تدخل النهائيات وتفوز علشان تباري البطل وتصير البطل الجديد، قبل كنت تخرج من بيتك علشان تصير بالبطل وتنقذ العالم، هنا أنت تشارك في بطولة رسمية أمام الكل.
الفرق هنا إنه الناس تعرفك وفي ناس يشجعوك ويشوفوا مبارياتك عكس قبل الي كنت تروح وتجي محد غالباً يعرفك غير أصحابك الي يكونوا حولك.
ولأنها بطولة رسمية فأنت تلبس ملابس رسمية وتشبه ملابس لاعبين كرة القدم، وتختار رقم خاص بك يكون على ملابسك وتنطلق بعدين علشان تجمع الأوسمة، لكن قبلها أكيد بتاخد بوكيمونك أول وهنا نجي لشي حلو في اللعبة، وهي البوكيمونات الجديدة الي حلوة، لطيفة ومميزة بكل أنواعها، تختار حقك وتنطلق مع صديقك/منافسك هوب، الي هو الأخ الصغير للبطل.
بتتعرف وتلاقي شخصيات حلوة وتشوف العالم وإقليم جالار الجميل ومناظرة الحلوة ونشوف الأماكن الجديدة الي فيه، والبوكيمونات ظاهرة وموجودة وتتمشى في العالم، تقدر تشوفها وتختار مين تبغا تقاتل أو تصيد بدل ما تمشي بالعشب بشكل عشوائي.
تقدر تخيم مع بوكيموناتك وتلعب وتتكلم معهم، وتقدر كمان تطبخ كاري بأنواع مختلفة وتاكلوا مع بعض، ودا ممكن يكون إضافة لطيفة ومسلية تخليك تستمتع مع بوكيموناتك.
مافي فروق كبيرة بين اللعبتين، الفروق في البوكيمون الأسطوري، بعض البوكيمونات الي تكون موجودة في سورد غير موجودة في شيلد والعكس، وإختلاف اتنين من رؤساء الأندية.
-----
ولكن.. منظر اللعبة كرسوم متواضع وعادي، مو سيء، لكن كانت في ألعاب نزلت قبلها على السويتش برسوم وبمظهر أحلى منها بكتير.
مع وجود هبوط في الإطارات بعض الأحيان وظهور واختفاء الشخصيات والبوكيمونات فجأة أثناء تجولك في العالم والمدن شي يخلي منظر اللعبة متواضع وللبعض مثلي محبط، أحب ألعاب بوكيمون وما ابغا اشوفها بدا الشكل الضعيف.
اللعبة استغرق تطويرها سنة تقريباً وباين في اختصارات كتيرة صارت في اللعبة، مع حركات الشخصيات المتشابهة مع الجيل السابق -جيل سن/مون- والموسيقى أغلبها بمستوى عادي ونادراً تكون في موسيقى حلوة.
في منطقة جديدة في اللعبة وهي ال"Wild Area" وهي منطقة كبيرة ومفتوحة تقدر تروح وتلفلف فيها وتقاتل بوكيمونات وتصيدهم، وداخلها مناطق مختلفة وكل منطقة لها منظر ومناخ مختلف والبوكيمونات الي في كل منطقة تتغير حسب المناخ والوقت الي تلعب فيه، لكن أغلب البوكيمونات الي فدي اللعبة بنسبة كبيرة هي بوكيمونات قديمة من الألعاب السابقة ودا النسبة لي شي ما أحبه، صرت بس أصيد بوكيمونات جالار واسحب على الباقي، لاني شفتهم وصدتهم وقاتلتهم من قبل اكتر من مرة.
موضوع البوكيمونات القديمة مزعجني، كدا الألعاب الي قبل ما صار لها بوكيمونات مميزة، لو كل لعبة لها بوكيمونات خاصة بيها مو موجودة قبل أو تتكرر بعدين كدا كل لعبة تصير مميزة ومختلفة ولها طابعها الخاص.
في نوع قتال جديد وهو ال"Dynamax Raids" تكون في كدا دوائر حجرية منتشرة في ال"Wild Area" وإذا كان طالع منها شعاع أحمر تقدر تقاتل بدي الطريقة، أنت وتلاته غيرك من الكمبيوتر أو تلاته أشخاص أونلاين اذا كنت مشترك بأونلاين السويتش تقاتلوا بوكيمون عملاق، ودا هو ال"Dynamax" تقدر تخلي بوكيمونك عملاق وهجماته تصير اقوى وإلخ.. لما تفوز على البوكيمون العملاق الي تواجهه تقدر تصيده أو لا، وتجيك مكافأت وأغراض كويسه، لكنه مو شي جديد وحلو، حسيته بسيط وما فيه عمق وكمان بطيء وتكراره يمكن يكون مزعج، حلو أول مره تشوفه مع التحول والانميشن والمؤثرات وكدا لكن يصير بايخ مع تكراره. وإذا عجبتك حركة إنك تخلي بوكيمونك عملاق كدا فأنت ما تقدر تسويها فأي وقت، في أماكن محينة وضد رؤساء الأندية فقط ودا يخلي استخدامها محدود.
واللعبة بدون تمثيل صوتي، ودا شي جداً ما عجبني وسلبية كبيرة، وجود العديد من الحوارات بدون تمثيل صوتي يخلي القراية كتيرة ومملة خصوصاً إن في حوارات وكلام يكون بايخ ومو مهم. لعبة من نوع RPG فيها حوارات كتيرة وفيها كلام ممل وبدون تمثيل صوتي شي سخيف.
-----
أثناء مغامرتي في اللعبة لاحظت إن النهاية وأخر جزئية باللعبة هي الجزئية الي اشتغلوا عليها كويس، كانت حلوة من مؤثرات وأصوات ولكن مع المشاكل السابقة صار مستواها عادي، ودا محبط
-----
بإختصار
الإيجابيات:
البوكيمونات الجديدة وتصاميمها المميزة.
الإقليم الجميل بأماكنه ومناظره.
بعض الشخصيات جيدة وحلوة.
بعض الموسيقى الجيدة.
فكرة التخييم والطبخ مع البوكيمونات قد تكون لطيفة للبعض.
السلبيات:
ضعفها من ناحية الرسوم.
أنميشن وتحريك الشخصيات العادي والمكرر في بعض الأحيان.
مشاكل ظهور وإختفاء الشخصيات والبوكيمونات فجأة.
هبوط في عدد الإطارات أحياناً.
السهولة الشديدة وقلة التحدي.
ال"Wild Area" الكبيرة والفاضية.
ال"Dynamax Raids" الجديدة والغير مثيرة.
كثرة الحوارات المملة.
عدم وجود تمثيل صوتي.
حشر العدد الكبير من بوكيمونات الألعاب السابقة.
-----
إذا أنت شخص جديد على السلسلة أو لعبت فقط الالعاب القديمة، يمكن ما تضايقك كل دي الاشياء، لكن بالنسبة لي ولأني لاعب السلسلة فكانت فيها العديد من الأشياء المحبطة وأتمنى تتعدل وما تتكرر، لو بعطيها تقييم بيكون تقريباً (5/10) أو (6/10) كان من الممكن تكون أحسن لو أخدوا وقت أطول في التطوير وما أستعجلوا.
لكن في إضافتين قادمة للعبة بها مناطق وشخصيات وبوكيمونات جديدة يمكن تكون شي إضافي حلو، سعر الإضافتين 30$ دولار وبتنزل كلها دي السنة ودا أحسن من أني أرجع أشتري اللعبة من جديد مع كم حاجة زيادة وب60$ دولار.
أنا أحب بوكيمون، لكن ما أبغا اللعبة تخرب وتنحلب وتتكرر مع الوقت وتصير لعبة سنوية تتكرر كل سنة…
-----
أعتذر جداً على كل دا الكلام الكتير الي كان فوق، أعرف إني ثرثرت كتير مره لكن حبيت اتكلم عن تجربتي وأنا ألعب.
شكراً لكم وأتمنى دعمكم علشان أستمر~♡
تعليقات
إرسال تعليق