رأيي بلعبة Xenoblade Chronicles 2: Torna – The Golden Country
يوو~ عدت مجدداً ؛^؛ من فترة قصيرة خلصت
Xenoblade Chronicles 2: Torna – The Golden Country
نزلت في 14 سبتمبر 2018 على جهاز السويتش فقط وسعرها 39.99$ وهي تعتبر إضافة للجزء التاني، لكن نقدر نشتريها كلعبة بشكل منفصل.
بصراحة، أنا ما أعرف أي شي عن السلسلة ؛^؛ وكنت ناوي أبدأ بالجزء التاني، لكن ما لقيته في المحل لما جيت اشتريه ولقيت الإضافة بداله وقررت أشتريها.
وعلى حظي طلعت أحداث الإضافة قبل أحداث الجزء التاني، ودا شي كويس ويمكن دا يحمسني للجزء التاني.
-
كلعبة "RPG" القصة والشخصيات شي مهم فيها، لكن هنا.. الشخصيات في البداية كانوا عاديين بالنسبة لي لكن مع الوقت صرت أهتم لهم لأنهم معي، والقصة كانت عادية في البداية واستمرت عادية لفترة وحتى لما بدأت تصير في أحداث ما كانت شي كبير، مجرد شرير يبغا يسوي أشياء شريرة واحنا لازم نوقفه.
النهاية مؤلمة، حلوة ولكن جرحتني كتير.. كانت درامية ومؤثرة علي -بكيت شويه- لكن كمان صارت أشياء في النهاية ما فهمتها وأظن لها علاقة بالجزء التاني.
أنا لعبت اللعبة في البداية بالأصوات الإنجليزية، وما عجبتني صراحة والأداء ما كان مره ممتاز، بعدين حولتها بأصوات يابانية وكانت أحلى بكتير من كل ناحية، لكن لاحظت إن الأسماء تغير في بعض الشخصيات بين الياباني والإنجليزي، مو شي كبير لكني لاحظته.
-
تصميم العالم كبير وواسع تقدر تتمشى وتستكشف فيه لكن البيئات حسيت مو متنوعه مره ولكن كان شكلها حلو وتصميمها جميل.
ولكن العالم حسيته شويه فاضي، ما عندي مشكلة مع حجمه بس كنت أغلب الوقت أمشي، وأمشي كتير مره لان المسافات بعيدة ودا كان ممل.
في شي ما عجبني وأنا ألعب وهو إنه وأنا ماشي اكمل في القصة أوقف فجأة وتجيني مهمة تبغاني أرفع مستوى ال"Community" علشان أكمل في القصة، وعلشان أرفع مستواها لازم أسوي مهام جانبية، ليش؟ هي أصلاً مهام جانبية أسويها لو أبغا ليش صارت هنا بالغصب، ومو كل المهام تقدر تسويها، بعض المهام تحتاج ترفع ال"Field Skills" الي هي مهارات تكون عند الشخصيات، بعضها يزيد مع الوقت حسب الشخصية والمهارة الي ترفعها وبعضها لازم تسويها بنفسك، بعض المهارات دي تحتاج منك مثلاً تسوي "Crafting" لأشياء معينة ودا تمطيط شفته ممل ويقتل المتعة أثناء اللعب وشي كان بايخ.
القتال يكون بشكل أوتوماتيكي، الشخصيات تضرب بنفسها، ولكن أنت تقدر تسوي حركات خاصة للشخصية الي تقاتل بيها، كل شخصية لها أربع حركات خاصة لكن ما تقدر تستخدمها طول الوقت، يكون لها عداد يزيد كل ما الشخصية ضربت بشكل تلقائي، وتقدر تبدل بين الشخصيات وأنت تقاتل حسب الفريق الي أنت مختاره، كل فريق له شخصيات وكل شخصية لها حركاتها الخاصة، تقدر تبدل الشخصيات وقت القتال لكن ما تقدر تبدل الفرق.
وأنا ألعب اللعبة في وضع المحمول يصير مرات تعليق وهبوط في الإطارات لما تكون في تأثيرات كتيرة تصير فنفس الوقت.
الصعوبة مو موزونة، مرات أقاتل وحوش أقل مني في المستوى ولكن أخسر ضدهم، ما ادري ليش تقدر تضيف للشخصيات اسلحة ودروع واكسسوارات تساعدهم لكن ما شفت منها فايدة، مره كان لفلي 60 وكنت أقاتل وحش لفله 45 ومع اني أعله منه في المستوى وضايف للشخصيات اشياء ومعدل عليهم لكنه مرات يهزمني، معرف ليش.
-
بإختصار
الإيجابيات:
تصميم العالم حلو.
شخصيات جيدة وممكن تنحب.
قصة جيدة ونهاية درامية حلوة.
السلبيات:
مستوى القصة عادي طوال الوقت (بإستثناء النهاية).
حجم العالم الكبير والفاضي نسبياً.
الصعوبة غير الموزونة.
التمطيط والمهام الجانبية الإجبارية.
بعض المشاكل التقنية الي تصير أثناء القتال.
-
خلصت اللعبة في 33:48:45 و، كانت تجربة لا بأس بها، يمكن لو بعطيها تقييم بيكون (5.5/10) ما اعرف لو انصحها لأحد، ولكن الي يحبوا السلسلة ومهتمين بالقصة يلعبوها ويمكن تكون حلوة بالنسبة لهم.
لكن، أنا حلعب الجزء التاني، لأن صراحة الشخصيات والنهاية حمسوني أعرف ايش يصير بعدين.
تعليقات
إرسال تعليق